An ka kanw kalanni donna Mali kalan taabolo la kabini waatijan. A bɛ kɛ lakɔlisow la, w’a balikukalan bɛ kɛ jamana fan bɛɛ. Mali dugumakalan minisiriso n’a jɛɲɔgɔncakɛdaw sɛbɛ donnen bɛ o ko ma kosɛbɛ walasa an ka kanw bɛ se k’u jɔyɔrɔ fa jamana ka ɲɛtaa sabaliti la cogo min na. O de kama, Sɛtanburukalo tile 8, n’o ye balikukalan tɔgɔladon ye diɲɛ kɔnɔ, u ye ɲɔgɔndan dɔ bila senkan balikukalan kalandenjolenw ni ɲɔgɔn cɛ. ɲinɛnta kunba, o kɛra : Balikukalan, tɛmɛn tɛ se ka k’a la yiriwalikuntalajan sabatili la. ɲɔgɔndan in kɛra kan 13 la n’olu ye : Bamanankan, bɔbɔkan, kadɔkan, fulakan, kasonkakan, miɲankakan, maninkakan, sinɛfɔkan, kɔrɔbɔrɔkan, marakakan tamasiyɛkikan ani bosokan ye. ɲɔgɔndan in sɛgɛsɛgɛli kɔfɛ, cɛ dɔw ni muso dɔw ye ɲɛfɛla sɔrɔ n’u dɔnko ye an ka kanw kalanni n’u sɛbɛnni na nin kan ninnu na : Bamanankan, kadɔkan, fulakan, miɲɛnkakan, marakakan, kɔrɔbɔrɔkan, sinɛfɔkan, tamasiyɛkikan. Dugumakalan minisiriso n’a jɛɲɔgɔncakɛdaw y’a ŋaniɲa ka jɔnjɔn di o fasokan dɔnba ŋana ninnu ma. O jɔnjɔn ninnu didon tun ye bi ye n’o ye desanburukalo tile 24 ye kanko ɲɛɲinin cakɛda la min tɔgɔdalen bɛ Abilayi Bari la. Dugumakalan minisiriso ɲɛmɔgɔw, a jɛɲɔgɔcakɛdaw ɲɛmɔgɔw ani kalanko ɲɛmɔgɔbaw marabolow kɔnɔ, olu caman ye ɲɔgɔn sɔrɔ kɛnɛ in kan. Jɔnjɔn kunfɔlɔ kɛra ɲɔsinmansin nafacaman ye. O ye jamana musokuntigi ka jɔnjɔn dilen ye min tara Sinkarima fɛ, n’o ye dugu ye Dandoli komini na, Bajangara mara la. Jɔnjɔntabaa ninnu bɛɛ ye dɔnnisabatisɛbɛn sɔrɔ n’a bɛ f’o ma tubabukan na dipulɔmu ani 50.000. Jɔnjɔntabaw, u bɔyɔrɔw ani u ka kanw filɛ nin ye : Tɔgɔ : Jamu Kanw Bɔyɔrɔ Alimadi Alasani Mayiga kɔrɔbɔrɔkan Gawo Elize Saye kadɔkan Duwazan Ibarahima Sanɔgɔ miɲankakan Kucala Jelika Buwarɛ bamanankan Segu Modi Banbi Jara marakakan Kayi Ngeda Jaafare Sankare fulakan Moti Saɲan Bɛngali sinɛfɔkan Sikaso Rayisata Walɛti Ulemani tamasiyɛkikan Gawo
Nin ko in kɛra nisɔndiyakoba ye ɲɛmɔgɔw bɛɛ bolo bawo, jɔnjɔntabaw bɛɛ y’u hakilina jira poyi dɔw senfɛ u ye minnu kalan jama ɲɛna kɛnɛ kan u ka kanw na. Nin jɔnjɔn in bɛ di dugumkalan minisiriso n’a jɛɲɔgɔnbaaradaw fɛ, k’a jira k’u sɛbɛ donnen bɛ balikukalanko la walasa ka kunfinya kɛlɛ k’a ban pewu an ka dugubaw kɔnɔ ani an ka togodaw la walasa dɔnni bɛ wara ka yiriwasiraw sabati jamana fan bɛɛ fɛ. Jɔnjɔn ninnu dira ka dusu don a taba la, u k’u cɛsiri halisa ka dɔ fara u ka baara kan ani u k’u jija u ka kalan in k’u nafa u ka su ni tile baaraw la u sigidaw la. Kɛnɛ kuncɛra ni minisiri nɔnabila kɛnɛ ka dantigɛli ye kɛnɛ in kan, n’o ye Adama Kulibali ye, sɛfudekabine ye (tubabukan na). A kɛlen kɔ ka bɛɛ fo seli la kɛnɛ in kan, a y’a jira ko ale nisɔndiyara kosɛbɛ jɔnjɔntabaa ninnu ka cɛsiri n’u sɛbɛdonni na balikukalan ma. A y’u fo kosɛbɛ k’a jira u la fana k’u ka dɔfara u ka cɛsiri kan bawo kalan tɛ ban, wa nafa bɛ kan bɛɛ kalanni na. A y’a jira ko su ni tile, kalan minisiriso n’a jɛɲɔgɔnbaaradaw b’u seko kɛ balikukalan sabatili la jamana kɔnɔ. A ye weele bila ko bɛɛ ka balikukalan ta sɛbɛ la walasa ka kunfinya kɛlɛ ka bɔ jamana kɔnɔ. Adama Kulibali ye kuma kuncɛ ni nisɔndiya kɛrɛnkɛrɛnnen ye ka ɲɛsin tubabukan fɔcogo dɔ sɔrɔli ma bamanankan na kɛnɛ in kan, bamanankan jɔnjɔntabaamuso in ka poyi senfɛ : yiriwali kuntaalajan (Développement durable.) dɔnnisabatisɛbɛn : attestation, diplôme.
NB : Des fois, le navigateur Internet explorer n’affiche pas correctement les caractères spéciaux des Langues Nationales . Si c’est le cas chez vous, pour voir correctement ces caractères, veuillez télécharger Fire fox , Google chrome ou Opera
